Mae hwn yn gontract cyfnod penodol am 2 flynedd ac mae yna 3 swydd ar gael

Cyfle Cyfartal

Mae Trafnidiaeth Cymru yn gwerthfawrogi amrywiaeth. Mae’n ein gwneud yn gryfach, yn ein helpu i ddeall ein cwsmeriaid yn well, i wneud penderfyniadau gwell a bod yn fwy arloesol. Mae pawb yn wahanol ac mae gan bawb eu safbwynt eu hunain felly rydym yn creu tîm amrywiol sy’n adlewyrchu’r cymunedau rydym yn eu gwasanaethu. Drwy hyn, rydym yn benderfynol o fod yn un o gyflogwyr mwyaf cynhwysol Cymru. Rydym yn creu rhwydwaith trafnidiaeth cynhwysol y gall pawb yng Nghymru fod yn falch ohono.

Pwy ydyn ni

Ein cenhadaeth yn Trafnidiaeth Cymru yw trawsnewid trafnidiaeth yng Nghymru a’i gwneud yn addas ar gyfer y dyfodol, boed hynny ar gyfer rheilffyrdd, bysiau, cerdded neu feicio. Rydyn ni eisiau ysbrydoli cenedl i newid y ffordd maen nhw’n teithio, fel bod pawb yn teithio’n fwy cynaliadwy ac yn helpu i fynd i’r afael â’r argyfwng hinsawdd sy’n wynebu pawb.

Rydyn ni’n lle agored a chynhwysol i weithio, lle mae croeso i bawb a lle caiff ein pobl eu cefnogi i gyflawni eu llawn botensial. Rydyn ni am greu awyrgylch sy’n galluogi ein pobl i dyfu a llwyddo. Mae hyn yn allweddol i’n galluogi i gyflawni’r addewidion rydyn ni wedi’u gwneud i bobl Cymru er mwyn adeiladu rhwydwaith trafnidiaeth gynaliadwy sy’n diwallu eu hanghenion nhw.

Cyfrifoldebau’r swydd
 

Nod Rhaglen UNO yw creu un platfform integredig ar gyfer holl wasanaethau cyhoeddus Trafnidiaeth Cymru.

Mae hon yn rhaglen drawsnewid ddigidol i gefnogi cwsmeriaid a chydweithwyr i gynllunio a thalu am eu teithiau, i gynnwys rhyngwyneb digidol hawdd ei ddefnyddio (gwefan ac ap newydd) a bydd yn galluogi cwsmeriaid i gynllunio teithiau, prynu tocynnau, a chael mynediad at wybodaeth amser ‘real’ ar gyfer mathau lluosog o drafnidiaeth. Bydd hyn yn gynhwysol ac yn cynnwys cymorth i'r rhai na allant ddefnyddio rhyngwynebau digidol.

Drwy symleiddio sawl ffordd yr ydym yn teithio drwy ddarparu profiad cwsmer di-dor, rhagwelir y bydd UNO yn cynyddu teithiau cynaliadwy, yn cynhyrchu refeniw, ac yn sicrhau manteision cymdeithasol ac economaidd sylweddol i Gymru.

Bydd y Dadansoddwr Busnes yn cefnogi tîm Trawsnewid Digidol UNO a ffrydiau gwaith eraill yn Rhaglen UNO i gyflawni gwaith ar draws y 4 ffrwd waith, i wella effeithiolrwydd Trafnidiaeth Cymru (TrC) fel sefydliad, ac i wella profiad defnyddwyr gwasanaethau trafnidiaeth gyhoeddus yn unol â pholisi a strategaeth trafnidiaeth Llywodraeth Cymru.  

• Dadansoddi prosesau presennol TrC i ddeall eu gweithrediad a’u heffeithiolrwydd drwy fapio’r prosesau presennol, casglu data perfformiad, a nodi meysydd i’w gwella. Dileu dyblygu, awtomeiddio tasgau, awgrymu newidiadau i’r system, gwella hyfforddiant, a gwella dogfennau i wella effeithlonrwydd, i leihau costau, ac i alinio prosesau ag amcanion y sefydliad.

• Arwain ar gofnodi gofynion busnes i gyflawni ffrydiau gwaith cymhleth drwy ymgysylltu â rhanddeiliaid a dogfennu gofynion busnes, gweithredu fel y rhyngwyneb rhwng y ffrwd waith, y busnes a’r tîm TG a Digidol i gadarnhau’r sgôr blaenoriaeth ar gyfer gwahanol ofynion.
   
• Arwain ar gasglu gofynion ar gyfer caffaeliadau cymhleth Rhaglen UNO drwy ymgysylltu â rhanddeiliaid mewnol ar draws y sefydliad, gan gynnwys cysgodi rolau gweithredol rheng flaen i ddeall anghenion defnyddwyr yn well.

• Llunio a pharatoi achosion busnes, papurau penderfyniadau ac adroddiadau cynnydd ar gyfer cyflawni Rhaglen UNO gymhleth a’u cyflwyno i’w hadolygu a’u cytuno gan Grwpiau Llywio Gweithredol a Byrddau Gweithredol, drwy weithio gyda rheolwyr prosiectau a thimau cyflenwi i bennu costau ac amserlenni, ar gyfer cyflawni gofynion a nodi’r rhain ochr yn ochr â’r holl fuddion cyfatebol sydd i’w cyflawni.

Am bwy rydyn ni’n chwilio

• Cymhwyster lefel gradd mewn TG neu brofiad cyfatebol.
• Profiad o gyflawni swyddogaeth Dadansoddwr Busnes ar amrywiaeth o brosiectau.
• Profiad amlwg o ysgrifennu dogfennau llif prosesau, adroddiadau prosiect, ac achosion busnes a gofynion ar gyfer dogfennau caffael.
• Gwybodaeth a phrofiad o gasglu gofynion ar gyfer caffael TG a Digidol.

Sgiliau Iaith Gymraeg

Byddai’r gallu i sgwrsio ac ysgrifennu yn Gymraeg yn ychwanegiad gwych at eich cais, ond nid yw’n hanfodol ar gyfer y swydd hon

Mae Trafnidiaeth Cymru yn cefnogi ac yn hybu gweithwyr i ddefnyddio’r Gymraeg, a bydd yn eu hannog i ddatblygu, gwella a chadw eu sgiliau Iaith Gymraeg. Rydym yn rhoi cefnogaeth lawn i staff sydd eisiau gwella eu sgiliau Cymraeg, ac mae datblygiad personol ar gyfer sgiliau Iaith Gymraeg yn cael ei gynnig mewn amrywiaeth o ffyrdd megis dysgu ar-lein, cyrsiau ystafell ddosbarth a chyrsiau cymunedol lleol

Y camau nesaf

A yw’r swydd hon yn swnio fel y cyfle rydych chi’n chwilio amdano? Hoffech chi gael gwybod mwy? Gweler y Disgrifiad Swydd sydd ynghlwm am ragor o fanylion.

Trafnidiaeth Cymru – yn arwain ar anableddau. Rydyn ni’n fodlon trafod unrhyw addasiadau rhesymol y bydd eu hangen arnoch yn y broses recriwtio neu fel rhan o’r swydd os byddwch chi’n llwyddiannus.

Bydd yr hysbyseb hon yn cau am hanner nos ar y diwrnod cau a nodir uchod. Rydyn ni’n eich annog i gyflwyno eich cais cyn gynted â phosibl.

* Cofiwch ein bod yn cadw’r hawl i gau’r swydd wag hon yn gynnar os daw digon o geisiadau i law.

**Sylwch fod yn rhaid i chi ddal yr hawl barhaol i weithio yn y DU. Nid ydym yn gallu darparu nawdd ar hyn o bryd.**