Mae hwn yn gontract tymor penodol hyd at 31 Awst 2025.

Cyfle Cyfartal

Mae Trafnidiaeth Cymru yn gwerthfawrogi amrywiaeth. Mae’n ein gwneud yn gryfach, yn ein helpu i ddeall ein cwsmeriaid yn well, i wneud penderfyniadau gwell a bod yn fwy arloesol. Mae pawb yn wahanol ac mae gan bawb eu safbwynt eu hunain felly rydym yn creu tîm amrywiol sy’n adlewyrchu’r cymunedau rydym yn eu gwasanaethu. Drwy hyn, rydym yn benderfynol o fod yn un o gyflogwyr mwyaf cynhwysol Cymru. Rydym yn creu rhwydwaith trafnidiaeth cynhwysol y gall pawb yng Nghymru fod yn falch ohono.

Pwy ydyn ni

Ein cenhadaeth yn Trafnidiaeth Cymru yw trawsnewid trafnidiaeth yng Nghymru a’i gwneud yn addas ar gyfer y dyfodol, boed hynny ar gyfer rheilffyrdd, bysiau, cerdded neu feicio. Rydyn ni eisiau ysbrydoli cenedl i newid y ffordd maen nhw’n teithio, fel bod pawb yn teithio’n fwy cynaliadwy ac yn helpu i fynd i’r afael â’r argyfwng hinsawdd sy’n wynebu pawb.

Rydyn ni’n lle agored a chynhwysol i weithio, lle mae croeso i bawb a lle caiff ein pobl eu cefnogi i gyflawni eu llawn botensial. Rydyn ni am greu awyrgylch sy’n galluogi ein pobl i dyfu a llwyddo. Mae hyn yn allweddol i’n galluogi i gyflawni’r addewidion rydyn ni wedi’u gwneud i bobl Cymru er mwyn adeiladu rhwydwaith trafnidiaeth gynaliadwy sy’n diwallu eu hanghenion nhw.

Cyfrifoldebau’r swydd

Bydd y Dadansoddwr Cymorth i Wasanaethau TG yn cefnogi ac yn darparu amrywiaeth o wasanaethau Technoleg Gwybodaeth er mwyn galluogi’r cwmni i gyflawni ei fusnes craidd.

• Rhoi cymorth i ddefnyddwyr gyda cheisiadau Cymorth TG sy’n dod i mewn drwy gysylltu’n uniongyrchol â defnyddwyr i gasglu gwybodaeth a sicrhau bod yr holl ymholiadau/materion TG yn cael eu cofnodi a’u trin yn effeithlon er mwyn cynnal lefel uchel o wasanaeth i gwsmeriaid a glynu wrth yr holl egwyddorion rheoli gwasanaeth.

• Uwchgyfeirio unrhyw broblemau sydd heb eu datrys (lle bo angen) at yr aelod o’r tîm TG sydd â phrofiad priodol neu drefnu cymorth allanol gan gyflenwyr trydydd parti lle nad oes modd datrys problemau’n fewnol er mwyn sicrhau bod problem y defnyddiwr yn cael ei datrys yn brydlon.

• Cofnodi ac olrhain y broses datrys problemau drwy system ddesg y Gwasanaeth TG, gan gynnwys yr holl benderfyniadau llwyddiannus ac aflwyddiannus a wnaed, unrhyw gamau a gymerwyd, hyd at y penderfyniad terfynol i sicrhau bod cofnod cyfredol o’r holl faterion a godwyd.

• Dysgu sut mae defnyddio meddalwedd, caledwedd a hen systemau penodol drwy nodi’r hyn sy’n cael ei ddefnyddio a’i gefnogi gan y busnes fel llwyfan Microsoft 365, gliniaduron Lenovo, cyfrifiaduron, tabledi a ffonau clyfar Motorola i helpu gyda’r broses datrys problemau os bydd problemau’n codi.

Am bwy rydyn ni’n chwilio

• Lefel sylfaenol o wybodaeth TG/gallu defnyddio TG.
• Lefel dda o lythrennedd er mwyn gallu ymateb i negeseuon e-bost gan gwsmeriaid a llenwi cofnodion y Ddesg Gwasanaeth.
• Yn gwrtais dros y ffôn ac yn canolbwyntio ar y cwsmer.
• Yn drefnus ac yn gallu blaenoriaethu gofynion gwahanol.

Sgiliau Iaith Gymraeg

Byddai’r gallu i sgwrsio ac ysgrifennu yn Gymraeg yn ychwanegiad gwych at eich cais, ond nid yw’n hanfodol ar gyfer y swydd hon

Mae Trafnidiaeth Cymru yn cefnogi ac yn hybu gweithwyr i ddefnyddio’r Gymraeg, a bydd yn eu hannog i ddatblygu, gwella a chadw eu sgiliau Iaith Gymraeg. Rydym yn rhoi cefnogaeth lawn i staff sydd eisiau gwella eu sgiliau Cymraeg, ac mae datblygiad personol ar gyfer sgiliau Iaith Gymraeg yn cael ei gynnig mewn amrywiaeth o ffyrdd megis dysgu ar-lein, cyrsiau ystafell ddosbarth a chyrsiau cymunedol lleol

Y camau nesaf

A yw’r swydd hon yn swnio fel y cyfle rydych chi’n chwilio amdano? Hoffech chi gael gwybod mwy? Gweler y Disgrifiad Swydd sydd ynghlwm am ragor o fanylion.

Trafnidiaeth Cymru – yn arwain ar anableddau. Rydyn ni’n fodlon trafod unrhyw addasiadau rhesymol y bydd eu hangen arnoch yn y broses recriwtio neu fel rhan o’r swydd os byddwch chi’n llwyddiannus.

Bydd yr hysbyseb hon yn cau am hanner nos ar y diwrnod cau a nodir uchod. Rydyn ni’n eich annog i gyflwyno eich cais cyn gynted â phosibl.

* Cofiwch ein bod yn cadw’r hawl i gau’r swydd wag hon yn gynnar os daw digon o geisiadau i law.

**Sylwch fod yn rhaid i chi ddal yr hawl barhaol i weithio yn y DU. Nid ydym yn gallu darparu nawdd ar hyn o bryd.*